rude

RUDE. adj. de tout genre. Raboteux, aspre au toucher. La toile grosse & neuve est bien rude. la haire, le cilice sur la chair est bien rude. il a la peau rude, le poil rude.

On le dit aussi des choses qui sont aspres au palais, au goust. Ce vin est bien rude.

Il sign. fig. Fascheux, severe, austere, difficile à supporter. Cet homme-là est bien rude. d'une humeur rude & insupportable. il est bien rude à ses escoliers. à ses valets. un mary rude à sa femme. voilà un rude temps, un temps bien rude. un froid extrémement rude. l'hiver a esté bien rude. une saison rude. un air rude. il luy dit de rudes paroles. ce traitement est bien rude. souffrir d'estre gourmandé par son inferieur, cela est bien rude. la regle de ces Religieux est bien rude.

On dit prov. A un homme qui traite durement ceux qui luy parlent, ceux qui ont affaire à luy, qu'Il est bien rude à pauvres gens.

On appelle fig. Rude asnier, Un Maistre qui traite rudement ses escoliers, ou ceux qui luy sont sousmis. Il est bas.

On dit fig. qu'Un homme est un rude joüeur, pour dire, qu'Il est bien à craindre.

Rude, signif quelquefois, Violent, impetueux. Un rude choc. une rude attaque. un rude assaut. un vent rude.

On le dit encore de plusieurs choses qui donnent de la peine, qui sont fatigantes. Un chemin rude. un carrosse bien rude. trot, amble bien rude. un cheval bien rude. cet homme a entrepris un rude travail. cette femme en accouchant, a eu un travail bien rude.

On dit aussi, Des vers rudes, un stile rude, pour dire, Des vers durs, qui blessent l'oreille, un stile dur & forcé.

On dit, Une voix rude, pour dire, Une voix dont le son est desagreable, & blesse l'oreille.

On dit, Un visage rude, pour dire, Un visage dont les traits sont sans douceur & sans agrément. Cette femme a le visage rude.

On appelle, Des yeux rudes, Des yeux qui ont quelque chose de farouche & de hagard.

Dictionnaire de l'Académie française . 1964.